Парламентот на Албанија едногласно го усвои, на 4 февруари 2010, новиот Закон за анти-дискриминација кој ја забранува дискриминацијата по неколку основи, вклучувајќи ги сексуалната ориентација и родовиот идентитет, со што Албанија влегува во редот на малкуте европски држави кои експлицитно ја забрануваат дискриминацијата по основ на родовиот идентитет.

Борците за правата на хомосексуалната заедница во Албанија ја поздравија половичната победа. Законот нуди заштита за ЛГБТ заедницата, но од него се избришани одредбите со кои се легализираат истополните бракови, по лобирањето на верските заедници и конзервативните десничарски групи.

Алијансата против дискриминација, албанска група за правата на хомосексуалците, го поздрави усвојувањето на законот како добар почеток, и покрај бришењето на одредбите за истополните бракови.

“Овој закон значи многу повеќе од исполнување на обврските што Албанија ги прифати во рамките на европските интеграции и визната либерализација“ велат во Алијансата, додавајќи дека ова е победа за демократијата и човековите права за сите граѓани на Албанија.

Албанскиот закон е чекор понапред од некои нови членки на ЕУ кои ја забрануваат дискриминацијата по основ на сексуалната ориентација во вработувањето, но не и во други области на животот.

ИЛГА-Европа (европскиот огранок на Меѓународната ЛГБТ асоцијација) го поздрави усвојувањето на законот и им честита на албанските групи за заштита на човековите права и ЛГБТ активисти, како и на политичарите, на овој значаен чекор во борбата против дискриминацијата.