Минатиот понеделник, 25 мај, Европската комисија го претстави најновиот извештај за напредокот на државите од Западен Балкан во исполнувањето на критериумите за вклучување во безвизниот простор за патување во ЕУ. Македонија е државата со најголем напредок, а Албанија и БиХ се најниско оценети. Извештајот е достапен на интернет страната на Иницијативата за европска стабилност (ЕСИ).

Поставените критериуми се однесуваа на безбедноста на документите, нелегалната миграција и реадмисијата, јавниот ред и безбедноста, и надворешните односи и основните права. Државите беа оценувани со оценки од 1 до 3, каде еден значи дека ги исполнувааат сите репери, а 3 значи дека не ги исполните реперите или дека се „на вистинскиот пат, но...„ Европскиот комесар за правда, слобода и безбедност Жак Баро најави дека ќе предложи укинување на визите за граѓаните на државите што ги исполнуваат реперите што е можно поскоро.

Покрај Македонија, чии граѓани можат да почнат да патуваат во ЕУ без визи веќе од следната година, Србија и Црна Гора ги исполнуваат најголемиот број репери, додека Албанија и Босна и Херцеговина не исполнуваат ниту едно од барањата. Косово не беше вклучено во процесот на оценување.

Првичниот извештај беше објавен во ноември 2008 година, по што следеа посети на експертските мисии на Европската комисија во државите на Западен Балкан, за да го дополнат извештајот со нови информации. Извештајот им е поднесен на владите на членките на ЕУ за разгледување, по што ЕК ќе ја подготви конечната верзија на извештајот за усвојување.